الحب اليومين دول

الكلام العاطفى والتعبيرات الرومانسية زادت اوى اليومين دولدى مش زادت دى رترطت (كترت أوى يعنى)

حبيب قلبى,, روحى,, نور عينى,, واحشنى يا غالى,, انت فينك يا قمر,, والنعمة الشريفة بموت فيك,,
الكلام الحو ده كله مكنش فى قاموسنا اليومى قبل كده

والكلام ده مش بيقولوا راجل لست او ست لراجل
لا راجل لراجل وست لست واى حد ممكن تقابله يقوم رازعك طقم حنية كده من غير اى مناسبة
وساعات من غير سابق معرفة

الشىء الغريب ان شلال الكلام الحلو ده وتعبير الحب الفظيع ده
جاى فى وقت الحب فيه انتهى تماما والناس مبقتش طايقة بعضها

والحقيقة ثورة الاتصالات والموبايلات اخترعتلنا وسائل جديدة للتعبير عن الحب
رنات ومسجات جاهزة يا دوب تتدوس سند ووصلت يا باشا

وكلنا طبعا فاكرين عبد الحليم حافظ ولبنة عبد العزيز فى الوسادة الخالية
ومكالمات التليفون اللى كانت شغالة بينهم طول الليل
ولبنة بتقوله بصوتها اللى يدوخ ( اقفل بقى يا صلاح )
وصلاح مش عاوز يقفل
كانت بتقول ياصلاح بطريقة خاللتنى اروح السجل المدنى عشان اغير اسمى
كان نفسى يبقى اسمى صلاح من حلاوة صلاح اللى بتقولها

وطبعا عبد الحليم ولبنى كانوا بيتكلموا بالساعات من غير اى مشاكل
عشان مصلحة التليفونات ايامها كانت بتدى فلوس للى يتكلموا فى التليفون
عشان يشجعوا الناس تتكلم

هنستعرض لبعض قاموس لالفاظ عاطفية جديدة دخلت حياتنا بعد ظهور الموبايل
تلاقى اللى بتكلمك فى نهاية المكالمة بتقولك يالا باى
ايه يالا باى كانها مش قادرة تسيبك انما يالا باى يالا باى
وبعدين طلعت حاجة جيدة سى يووو بقى ايه سى يووو دى

خدوا دى جديدة برده فى نهاية المكالمة بعد يالا باى وسى يو والحاجات دى
وفجاة قبل مهبد السماعة فى وشها الاقيها بتقولى تيك كير بقى تيك كير
ايه تيك كير دى هى بتكلمنى وانا بتسلق جبل المقطم وخايفة اصل اقع على جدور رقبتى
ولا انا رايح اتخانق مع جماعة فى الدويقة واحتمال اروح ومرجعش
كده فى المطلق خللى بالك من نفسك طيب اتييك كير من ايه

ظاهرة تانية دى غيظانى شوية لو بتتصل بى واحد وارد عليها واقول الو
تقوم هى مخضوضة على طول وتقولى مالك صوتك مش عاجبنى طمنى عليك
انا مقولتش غير الووو
احلفلها انى كويس جدا ومفيش اى حاجة
وطبعا هى مش مصدقانى فكرانى مخبى عليها الموصيبة اللى انا واقع فيها
بليز قولى متخبيش علىّ حاجة
ايه القصة يا جماعة والنعمة مافيه اى حاجة

ولازم طبعا اجارى مشاعرها عشان هى مخضوضة لازم يكون عندى انا كمان حاجة تخض
امال اسيبها تتخض عالفاضى كده
مفيش اصلى عندى بس شوية انفلوانزا تقوم مصرخة مع انى كنت بطمنها
ومروحتش للدكتور لحد دلوقتى انت لازم تعمل تشيك اب لا يمكن
الولية دى بتصوت على مين
انا بقولها عندى انفلوانزا عادى مش انفلوانزا الطيور

وعلى كده على طول بقيت شايف اللى حواليا نازلين حب فى بعض وخوف على بعض
كل الكلام حلو كل الاحضان دافئة كل اللقاءات سبايسى
لدرجة ان احنا مش مكفينا عيد حب واحد فى السنة
عندنا اتنين فلانتين واحد فى فبراير وواحد فى نوفمبر
امال نودى الحب اللى عندنا ده كله فين

وفى الافراح تلاقى المعازيم نازلين رقص وزراغيت
والعروسة والعريس فى منتهى السعادة بحب الناس

بس قرب انت ساعدتك جمب اى طربيزة ولمع الاوكر (اسمع يعنى)
هتلاقى اللى قاعدين نازلين تقطيع فى فروة العريس والعروسة واهلهم

ولو دخلت عزى تلاقى المعزيين نازلين عياط ونهنهة
لدرجة انك ساعدتك متعرفش اللى مات ده اصلا قريب مين
قرب كده شوية ولمع الاوكر تلاقى اللى كان حاطط راسه فى ايده ونازل نهنهة
بيقول للى جنبه فى الصيوان سمعت اخر نكته

حب حب حب
فى كل حته حب فى الكافيهات فى الشارع فى النوادى فى المصالح الحكومية
مش شايف قدامى غير عشاق ونظرات وتسبيل وعواطف
يارب شوية كراهية بقى الحب مالى البلد


(مأخوذ من برنامج تليفزيزنى)

موضوع جيد

هاكتبو فى التعبير عندى فى الامتحان

شكراااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا